Trinity Vs Oneness | Bible in a sawi dan diktak chu

1. Pathian Nihna (The Nature of God) Trinitarian te chuan Pathian pakhatah mi nung (Persons) pathum Pa, Fapa, leh Thlarau Thianghlim an awm tih an ring. Mimal nihna hrang nei si, Pathian pakhat chauh an ni.

Oneness te erawh chuan Pathian chu mi pakhat chauh a ni a. Thuthlung Hlui hunah PA ngin, khawvelah Fapa (Isua) angin, leh tun hnuah Thlarau Thianghlim angin amah leh amah a rawn intarlang thin a, Isua chauh kha Pathian chu a ni tiin an ring.

2. Baptisma Leh Chhandamna sawi dan : Trinity : Isua Lal thuchhuah (Matthaia 28:19) anga rawngbawlin: “Pa leh Fapa leh Thlarau Thianghlim hmingah” baptisma an chantir thin a. Chhandamna chu rinna chauhva dawn (Ephesi 2:8-9) a ni a, baptisma hi chhandam kan nih tawh zia lanna a ni zawk tiin an ring. Oneness: Tirhkohte Thiltih 2:38-a tarlan ang khan “Lalpa Isua Krista hming chauhvin” baptisma an chan tir thin. Chhandam nân hian: Simna, Isua hminga baptisma chan, leh Thlarau Thianghlim (ṭawnghriatlohva ṭawng) dawn a ngai kher tih an ring tlat a ni.

Oneness te hian Deauteronomy 6:4 “Aw Israel mite u, ngaithla teh u, LALPA kan Pathian chauh chu LALPA a ni a; ‭/ NKJV‬ “Hear, O Israel: The Lord our God, the Lord is one! tih hi an tan chhan atan an hmang. Mahse, He laia Hebrai ṭawng “Pakhat/One” tihna thumal hman chu "Echad" a ni. He thumal hi "pumkhat/khawm" (collective oneness) sawina a ni a. Hemi thumal ngei hi Genesis 2:24-ah nupa chungchang sawi nân khan hman a ni. ‭"Chuvângin, mipain a nu leh a pa a kalsan ang a, a nupui a vuan ang; tichuan, tisa pumkhat/Echad an lo ni tawh ang. Tih anih kha.

Deuteronomy 6:4-a "Echad" (Pumkhat) awmzia fiahna ṭha ber chu he Genesis 2:24 hi a ni a, Bible-ah hian thumal inang chiah hman a ni. Nupa chu mimal pahnih (Pasal leh Nupui) ni siin, Genesis 2:24-ah 'Echad' (Pumkhat) an ni a ti a. Chutiang chiah chuan, Pathian pawh mimal pathum (Pa, Fapa, Thlarau Thianghlim) ni siin, Deuteronomy 6:4-ah 'Echad' (Pathian pakhat) a ni a ti leh a ni. Chuvang chuan Pathian pakhat a nihna hian Trinity (Mimal pathum nihna) a ti bo lo. Deuteronomy hi Hebrai tawng a ziah hmasak ber ani reng bawk anih kha.

Chuan Oneness ten "Kei leh Pa chu pumkhat kan ni" (Johana 10:30) a ziak kha an tan chhan leh ani bawk. Isuan "pumkhat kan ni" a tih lai hian Greek ṭawngin "Hen" (one in essence/nature - nihnaa pumkhat) tih a hmang a, mimal pakhat sawina "Heis" a hmang lo. Hemi awmzia chu “Kei leh Pa chu nihna leh thiltheihnaah pumkhat kan ni”* a ti a ni zawk. Isua ṭawngṭai lai (Johana 17) thlir hian mahni leh mahni inbiak a nih loh zia leh Pa leh Fapa chu mimal nihna hrang an nih zia a lang fiah hle.

Tichuan Oneness te chuan ‭TIRHKOHTE 2:38 "Tin, Petera chuan an hnênah, “Sim ula, in sual ngaihdam nân Isua Krista hmingin baptisma chang ṭheuh rawh u; tichuan, Thlarau Thianghlim pêk hi in hmu ang." Tih kha an tan chhan em em bawk ani. "Isua hmingin" tih awmzia chu "Isua thuneihna (Authority) hnuaiah" tihna a ni. Entirnan, Palai pakhatin "VCP hmingin thu ka rawn puang e" a tih chuan, VCP thuneihna a hman zia sawina a ni zawk. ‭Matthaia 28:19 A inziak "Chutichuan, kal ula, hnam tina mi zirtîrahte siam ula, Pa leh Fapa leh Thlarau Thianghlim hmingah chuan baptis ula," tih khan Baptisma chandan ah hian Trinity ten an tih sual loh zia a nemnghet hle bawk.

Bible Thlîrna Leh Tlangkawm na :

Bible pum thlirin, Trinity rinna hi Bible châng hrang hrang nena thluna inkalh lo tura hrilhfiahnaah chuan a thak zawk hle a ni: 1. Luka 3:21-22 (Isua Baptisma): Fapa tuiah a awm a, Thlarau Thianghlim ṭhuro angin a rawn chhuk a, Pa aw van aṭangin a lo chhuak rual vek a ni. 2. Kraws chunga mi sual (Luka 23:43): Kraws chunga mi sual kha tuia baptisma chang hman lo a ni a, mahse Isua a rinna leh a tan na vang chauh in chhandam a ni nghal ani, ISUA ngeiin a sawi ani. Hemi hian baptisma chan kher leh ṭawnghriatloh a heiraw/eeekhai kherloh pawn Vanram kan luh theih zia ati chiang.

UPC te hian Trinity chu Piangthar eng ang mah ula Vanram in lut thei chuanglo! Minti thin.. an zavaiin hetiang ngaihdan hi an tawm vek em tih erawh ka hre hauh lo thung...

Bible-ah hian 'UPC pawl' emaw 'Baptist pawl' emaw 'Presbyterian' emaw a awm lo. Chhandamin kan awmna tur van hnuai mihring zîngah hming dang reng a awm lo, Isua Krista hming chauh a ni (Tirhkohte 4:12). Chuvang chuan UPC nih leh nih loh hi vanram luhna a ni lo a, Isua Krista hi Lal leh Chhandam tu a pawm hi ani zawk.

Chuan, Isua Krista ruala krawsa an khenbeh mi sual khan UPC thurin zui lai a nei lo. Tuia baptisma a chang hman lo a, ṭawng hriat lohvin a ṭawng hek lo. Mahse Isua a rinna chauh vang khan vanram (Paradise) a kai nghal. Rinna chauhva chhandamna hi Bible zirtirna bulpui a ni (Ephesi 2:8-9).

1 Korinth 12-naah Tirhkoh Paula khan chiang takin ringtu zawng zawng hi tirhkoh kan ni lo a, zirtirtu kan ni lo a, ṭawng hriat lohva ṭawng zawng zawng kan ni hek lo etc. a ti. Original Greek text-ah) chuan he zawhna tinreng mai hi "Mē" tih thumal hmanga tan vek a ni. Greek grammar danah chuan zawhna te a "Mē" ti a inṭan tawh phawt an nih chuan, a chhanna lo awm tur chu "Aih, ni lo" (No) tih a ni ngei ngei tur a ni. Ringtu zawng zawngin ṭawnghriatloh kan neih vek loh zia Bible-in a sawi miau avangin, ṭawnghriatloh neih kher chhandamna hmel lanna (requirement) anga UPC-in an sawi hi Bible kalh a ni zawk.

Pathian chu a nihna (essence)-ah pakhat ni siin, mimal nihna (persons) pathum—Pa, Fapa, leh Thlarau Thianghlim—ah chatuanin a awm a ni tih hi Genesis aṭanga Thu Puan thleng mai ni lo, Hebrai leh Greek thumal ziah dante thlengin a tichiang a ni.

Chutiang bawkin, vanram kan luhna tûr chu pawl (denomination) hming a ni lo a, kan thiltih ṭhatna leh sacramenti (baptisma leh ṭawnghriatloh) kan neih vek vâng a ni hek lo. 1 Korinth 12-na sawi angin thilpek zawng zawng kan nei vek lo a, mahse chhandamna erawh Isua Krista chauh kan thinlung taka kan rinna leh a khawngaihna avang a ni zawk.

Mihring thurin leh zirtirna danglamin min hruai hrang suh se, kan innghahna chu Pathian Thu Tak chauh hi lo ni rawh se.

AMEN.